सर्लाही, २०६६ पुस २६ -
पुर्नगठीत माओवादी पार्टीका कार्यकर्ताले नागरिकता बनाउन घुस लिएको भन्दै इलाका प्रशासन कार्यालय हरिऔनका अधिकृतलाई आइतबार कालोमोसो दलेका छन् ।
इश्वरपुर गाबिस-५ की पगनीदेवी चौधरीको नागरिकता बनाउन अधिकृत टिकाराज पौडेलले एक हजार ५ सय घुस लिएको भन्दै अपरान्ह मातृका यादब समूहका कार्यकर्ताले कार्यालयबाट निकाली कालोमोसो दलेका हुन् ।
पार्टीका सह सेक्रेटरी भिम पौडेलले गरिब आदिबासी महिलाको नागरिकता बनाउँदा कागजपत्र पुगेन भन्ने बहानामा घुस लिएको सूचना पाएपछि कार्यकर्ताले कालोमोसो दलेको बताए । 'हामी पुगेपछि उनले पैसा फिर्ता लैजानु भने,' पौडेलले भने, 'सार्वजनिक स्थानमा घुस फिर्ता हुनुपर्छ भनेर कार्यालयबाट उनलाई निकालेपछि कार्यकर्ताले कालोमोसो दले ।'
नजिकै रहेको इलाका प्रहरी कार्यालय अघिल्तीर अधिकृत पौडेललाई कार्यकर्ताले कालोमोसो दलेका थिए । कालोमोसो दलेपछि प्रहरीले हस्तक्षेप गरी अधिकृत पौडेललाई इलाका प्रहरी कार्यालय भित्र सुरक्षामा राखेको थियो ।
जिल्ला प्रशासन कार्यालयका प्रशासकीय अधिकृत मेघनाथ पाध्याले सुनियोजित ढंगले पौडेललाई फसाउन घुसको नाटक मन्चन भएको बताए । नागरिकता बनाउन आएको समुहले नै पौडेलेको घर्रामा जबर्जस्ती खामबन्दी पैसा राखेर घुस लिएको भन्दै कालोमोसो लगाएको पाध्याले बताए ।
प्रहरी कार्यालय अघिल्तीरै घट्ना भएपनि मोसो दल्ने कोही पक्राउ परेका छैनन् । प्रहरीले अधिकृत पौडेललाई तत्काल मातृका यादबका कार्यकर्ताबाट मुक्त गरेपनि कसैलाई पक्राउ गरेको थिएन् । केहिबेर प्रहरी कार्यालय अगाडि नाराबाजी गर्दै मासो दल्ने समूह र्फकेको थियो ।
--ekantipur.com
अमन कोइराला
Comments :
Post a Comment