विराटनगर, चैत्र २९ - चुरे भावर राष्ट्रिय एकता पार्टी र चुरेभावर राष्ट्रिय पार्टीबीच देखिएको आधिकारिकता लडाईं जिल्ला तहसम्म आइपुगेको छ । एक मात्र सभासद केशवप्रसाद मैनालीले चुरेभावर राष्ट्रिय एकता पार्टी छाडेर छ महिना अघि करिब ९० प्रतिशत केन्द्रीय सदस्य लिएर चुरेभावर राष्ट्रिय पार्टी गठन गरेपछि विवाद केही मथ्थर भएको थियो । तर अहिले जिल्ला तहमा पार्टी संयन्त्रहरुमा को सहभागी हुने भन्ने विषयमा दुई पार्टी विच आरोप प्रत्यारोप हुन थालेको छ । सभासद भएको पार्टी नै राष्ट्रिय पार्टी हुने बताउदै चुरेभावर राष्ट्रिय पार्टीलाई स्थानिय निकायहरुका संयन्त्रमा सहभागी गराएपछि चुरेभावर राष्ट्रिय पार्टीले त्यसको विरोध गर्न थालेको छ । अध्यक्ष हिमालय प्रधानाङ्गले चुरेभावर राष्ट्रिय एकता पार्टीको मोरङ्गमा जिल्ला कार्यालयको उदघाटन गरेपछि दुई भावर विच विवाद चुलिएको हो । चुरेभावर राष्ट्रिय एकता पार्टीले विज्ञप्ती जारी गरि चुरेभावर राष्ट्रिय पार्टीका उपाध्यक्ष घनश्याम टण्डन क्ष्ाेत्रीले आफ्नो पार्टीको नाममा संयन्त्रमा सहभागिता जनाएको उल्लेख गर्दै आपत्ती प्रकट गरेपछि पुनः टण्डनले विज्ञप्ती निकाली आफ्नो पार्टी राष्ट्रिय मान्यता प्राप्त पार्टी भएकाले सोही हैसियतमा संयन्त्रहरुमा सहभागिता जनाएपनि अन्य कुनै दलको नाममा आफुले सहभागिता नजनाएको प्रष्ट्याएका छन् । चुरेभावर राष्ट्रिय एकता पार्टीका अध्यक्ष केशवप्रसाद मैनालीलाई तत्कालिन बरिष्ठ उपाध्यक्ष बाबु थापा समूहले निष्कासन गरेको भन्दै पार्टीको आधिकारिकता आफुहरुले पाउनु पर्ने विषयमा तीन वर्ष अघि सर्बाेच्चमा मुद्धा दायर गरेपछि चुरेभावरको विवाद सडक सम्म आएको थियो । सोही बेला बाबु थापाको समूहले चुरेभावर अध्यक्ष मैनालीका छोरा समिर मैनालीलाई हरिऔनमा सांघातिक आक्रमण गरेका थिए । सोही बेला बाबु थापा हातहतियार र ज्यान मुद्दामा कारागार चलान भएका थिए । तर सर्बाेच्चमा दुई वर्षदेखी बिचाराधिन रहेको मुद्धाको फैसला आउनु अघि नै महासचिव भूमिराज निरौलाले थापाको पक्ष लिएर संस्थापन पक्षलाई हराउन लागेको भन्दै सप्तरीको माहुलीमा गत असार २८ गते बसेको केन्द्रीय समितिको बैठकले महासचिवबाट भूमि निरौलालाई हटाएको थियो । उक्त बैठकमा ३६ जना केन्द्रीय सदस्य सहभागि रहेका थिए । तत्कालीन बरिष्ठ उपाध्यक्ष शिवप्रसाद तामाङ्ग र हिमालय प्रधानाङ्ग भने बैठकमा सहभागि थिएनन् । त्यस लगत्तै निरौलाले राजधानीमा पत्रकार सम्मेलन गरि पार्टी अध्यक्ष मैनालीलाई साधारण सदस्यता समेतबाट हटाएको सार्बजनिक गरे । एकले अर्कालाई निकाला निकाल चलिरहेको बेला पार्टी अध्यक्ष मैनालीले ९० प्रतिशत केन्दि्रय सदस्य लिएर छ महिना अघि चुरेभावर राष्ट्रिय पार्टी खोले । मैनाली पक्ष आधिकारीक होइन र सभासदबाट मैनालीलाई हटाउनु पर्छ भनेर प्रधानाङ्ग पक्ष लागेको छ भने मैनालीले संसद सचिवालय सिंहदरवारमा चुरेभावर राष्ट्रिय पार्टी दर्ता गरिसकेका छन् ।
Comments :
Post a Comment